Бағаны көтеру аукционы:

1) Аукцион басталған сәтте аукцион залында қатысушылардың сауда нысаны бойынша баға ұсыныстары көрсетіледі, олар қатысушылардың сауда нысанын белгіленген шарттарды сақтай отырып сатып алуға келісімін білдіру нысаны болып табылады және ағымдағы баға қалыптастырылады;

2) Аукцион басталған сәттен бастап қатысушыға басқа қатысушының ең жоғары ағымдағы бағасын Қағидалардың 40-тармағында белгіленген қадамға арттыру мүмкіндігі беріледі. Қағидалар Қазақстан Республикасы Ауыл шаруашылығы министрінің 2021 жылғы 15 қазандағы №297 бұйрығымен бекітілген (бұдан әрі – Қағидалар);

3) Егер аукцион басталғаннан кейін жиырма минут ішінде қатысушылардың ешқайсысы ең жоғары ағымдағы бағаны көтермесе, онда жеңімпаз болып оны ұсынған қатысушы танылады және осы сауда нысаны бойынша аукцион өткізілген болып есептеледі;

4) Егер аукцион басталғаннан кейін жиырма минут ішінде аукцион залында қатысушылардың бірі басқа қатысушының ең жоғары ағымдағы бағасын Қағидалардың 40-тармағында белгіленген қадамға арттыру арқылы сауда нысанын сатып алуға ниетін растаса, онда ағымдағы баға белгіленген қадамға көтеріледі;

5) Егер ағымдағы баға көтерілгеннен кейін жиырма минут ішінде қатысушылардың ешқайсысы сауда нысанын сатып алуға ниетін ағымдағы бағаны көтеру арқылы растамаса, онда жеңімпаз болып сауда нысанын сатып алуға ниетін соңғы болып растаған қатысушы танылады және аукцион өткізілген болып есептеледі.

Егер бағаны көтеру аукционы аяқталған сәтте, сағат 17:00-де, жеңімпаз анықталмаса, онда жеңімпаз болып сауда нысанын сатып алуға ниетін соңғы болып растаған қатысушы танылады және осы сауда нысаны бойынша аукцион өткізілген болып есептеледі.

Егер аукцион басталған сәтте екі немесе одан да көп қатысушылардың баға ұсыныстары сауда нысаны бойынша бірдей ең жоғары бағаны қамтыса және бұл ағымдағы баға жиырма минут ішінде көтерілмесе, онда осындай баға ұсынған қатысушылардың ішінде аукцион залында баға ұсынысы өзге қатысушыларға қарағанда ертерек тіркелген қатысушы жеңімпаз болып танылады.

Әрбір сатылған сауда нысаны бойынша сауда нәтижелері Сауда нәтижелері туралы хаттамамен ресімделеді, ол веб-порталда сатушы мен жеңімпаз тарапынан ЭЦҚ арқылы сауда өткен күні қол қойылады.

Сауда нәтижелері туралы хаттама сауда нәтижелерін бекітетін және жеңімпаз бен сатушы арасында жер учаскесін немесе жер учаскесін жалға алу құқығын сатып алу-сату шартын жасауға негіз болатын құжат болып табылады.

Жер учаскесін немесе жер учаскесін жалға алу құқығын сатып алу-сату шарты электрондық форматта веб-порталда жасалады және сауда нәтижелері туралы хаттамаға қол қойылған күннен бастап екі жұмыс күні ішінде сатушы мен сатып алушы тарапынан ЭЦҚ арқылы қол қойылады.