Мүліктік жалға (арендаға) беру объектісін сенімгерлік басқаруға беру бойынша тендерді өткізу қағидалары:

1. Кепілдік жарнаны төлеу және тендерге қатысушыларды тіркеу Реестрдің веб-порталында тендер өткізу туралы хабарландыру жарияланған күннен бастап жүзеге асырылады және тендер өткізілгенге дейін екі сағат бұрын аяқталады.

2. Тендерге қатысуға арналған өтінімдерді ашу Реестрдің веб-порталы арқылы хабарландыруда көрсетілген тендердің күні мен уақыты басталған кезде автоматты түрде жүргізіледі.

Егер өтінімдерді қабылдау мерзімі аяқталған сәтте бір ғана өтінім немесе мүлде өтінім болмаса, тендер өтпеген болып танылады (екінші және кейінгі тендерлерді қоспағанда).

Егер тендер өтпеген болып жарияланса, өтінімдер ашылмайды және жалға беруші Қазақстан Республикасы Ұлттық экономика министрінің 2015 жылғы 17 наурыздағы № 212 бұйрығымен бекітілген «Мемлекеттік мүлікті мүліктік жалға (арендаға) беру қағидаларының» 35-тармағына сәйкес ЭЦҚ қолдана отырып «Өтпеген тендер туралы актіге» қол қояды.

3. Комиссия қатысушылардың өтінімдерін (бағалық ұсыныстан басқа) қарап шығып, тендер талаптарына сәйкес келетін және сәйкес келмейтін қатысушыларды (себебін көрсете отырып) анықтайды.

4. Жеңімпазды Система тендер талаптарына сәйкес келетін қатысушылардың бағалық ұсыныстарын салыстыру нәтижесінде анықтайды. Жеңімпаз болып, өз өтінімінде объектіге ең жоғары жалдау ақысын ұсынған қатысушы танылады.

Әрбір жалға беру объектісі бойынша тендер нәтижелері электрондық хаттамамен рәсімделеді, ол тендер өткізілген күні Реестрдің веб-порталында жалға беруші мен жеңімпаз тарапынан ЭЦҚ қолдана отырып қол қойылады.