Көмірсутектер бойынша бағаны көтеру аукционын өткізу қағидалары:

1) аукцион басталған сәтте аукцион залында объект үшін қатысушылардың жазылу бонусының мөлшері бойынша ұсыныстары көрсетіледі, олар объектіні шарттарды сақтай отырып сатып алуға келісімін білдіру нысаны болып табылады және ағымдағы жазылу бонусының мөлшері қалыптастырылады;

2) аукцион басталған сәттен бастап қатысушыға басқа қатысушының ең жоғары ағымдағы жазылу бонусының мөлшерін Қағидалардың талаптарына сәйкес белгіленген аукцион қадамына арттыруға мүмкіндік беріледі. Аталған Қағидалар Қазақстан Республикасы Энергетика министрінің м.а. 2020 жылғы 30 шілдедегі №269 бұйрығымен бекітілген;

3) егер аукцион басталғаннан кейін 20 (жиырма) минут ішінде қатысушылардың ешқайсысы ең жоғары ағымдағы жазылу бонусының мөлшерін арттырмаса, онда оны ұсынған қатысушы аукцион нәтижелерінің тізілімінде сауда жүйесімен бекітіледі және осы объект бойынша аукцион өткізілген болып танылады;

4) егер аукцион басталғаннан кейін 20 (жиырма) минут ішінде аукцион залында бір қатысушы жазылу бонусының бастапқы мөлшерін Қағидалармен белгіленген аукцион қадамына арттыру арқылы объектіні сатып алу ниетін растаған жағдайда, жазылу бонусының бастапқы мөлшері белгіленген аукцион қадамына артады;

5) егер жазылу бонусының бастапқы мөлшері немесе ағымдағы мөлшері арттырылғаннан кейін 20 (жиырма) минут ішінде қатысушылардың ешқайсысы ағымдағы жазылу бонусының мөлшерін арттыру арқылы объектіні сатып алу ниетін растамаса, онда объектіні сатып алу ниетін соңғы болып растаған қатысушы аукцион нәтижелерінің тізілімінде сауда жүйесімен бекітіледі және осы объект бойынша аукцион өткізілген болып танылады. Осы объект бойынша аукцион нәтижелерінің тізілімі уәкілетті органның электрондық поштасына жіберіледі.

Аукцион объект бойынша қатысушылардың бірі ұсынған ең жоғары жазылу бонусының мөлшеріне дейін жалғасады.

Әрбір объект бойынша аукцион нәтижелері Аукцион нәтижелері туралы хаттамамен рәсімделеді, ол сауда жүйесінде комиссия мүшелерімен аукцион өткізілген күні қол қойылады. Хаттаманың электрондық көшірмесі сауда жүйесінде көрсетілген жеңімпаздың электрондық поштасына жіберіледі.

Аукционға қатысу үшін төленетін жарна операторға төленеді және аукционға қатысуға өтініш берген тұлғаға қайтарылмайды. Оператор аукционға қатысу үшін төленген жарнаны аукционға қатысуға өтінішті сауда жүйесі қабылдаған күннен бастап 3 (үш) жұмыс күні ішінде республикалық бюджет кірісіне аударады.