Мемлекеттік емес мүлікті мүліктік жалдауға (жалға) беру жөніндегі тендерді өткізу қағидалары:
1. Кепілдік жарнаны төлеу және тендер қатысушыларын реестрдің веб-порталында тіркеу тендер өткізу туралы хабарландыру жарияланған күннен басталып, тендер басталуына екі сағат қалғанда аяқталады.
2. Тендер қатысушылардың бағалық ұсыныстар беруі арқылы өткізіледі және олардың бірі ұсынған ең жоғары бағаға дейін жалғасады. Бағалық ұсыныс аукцион залына кірген кезде көрсетіледі және бастапқы жалдау ақысының мөлшерінен кем болмауы тиіс.
3. Тендер басталған сәтте аукцион залында қатысушылардың аукцион залына кірген кезде көрсеткен бағалық ұсыныстары көрсетіледі. Олар қатысушылардың тендер шарттарын сақтай отырып объектіні жалдауға келісетінін білдіреді және ағымдағы баға қалыптастырылады.
4. Тендер басталған сәттен бастап қатысушыға басқа қатысушының максималды ағымдағы бағасын Регламенттің 37-тармағына сәйкес белгіленген қадамға ұлғайту мүмкіндігі беріледі. Электрондық сауда-саттық өткізу регламенті «Ақпараттық-есептеу орталығы» АҚ Директорлар кеңесінің 2017 жылғы 27 желтоқсандағы № 94 шешімімен бекітілген.
5. Егер тендер басталғаннан кейінгі жиырма минут ішінде ешбір қатысушы максималды ағымдағы бағаны көтермесе, оны ұсынған қатысушы жеңімпаз деп танылады және бұл жалдау объектісі бойынша тендер өткен деп есептеледі.
6. Егер тендер 17:00-де аяқталған сәтте жеңімпаз анықталмаса, соңғы болып объектіні жалдауға ниетін растаған қатысушы жеңімпаз деп танылады және бұл жалдау объектісі бойынша тендер өткен деп есептеледі.
7. Тендер басталған сәттен бастап аукцион залында тек бір қатысушының бағалық ұсынысы көрсетілсе, тендер өткен болып есептеледі және осы қатысушы жеңімпаз деп танылады.
Әрбір жалдау объектісі бойынша тендер нәтижелері сауда-саттық нәтижелері туралы электрондық хаттамамен ресімделеді. Хаттама тендер өткізілген күні реестр веб-порталында жалға беруші және жеңімпаз тарапынан ЭЦҚ қолдану арқылы қол қойылады.
Шарт сауда-саттық нәтижелері туралы хаттамаға қол қойылған күннен бастап бес жұмыс күнінен кешіктірілмей реестр веб-порталында жалға беруші мен жеңімпаз тарапынан ЭЦҚ арқылы қол қойылады.
