Борышкердің (банкроттың) мүлкін сату бойынша аукцион өткізу қағидалары:

аукцион басталған сәтте аукцион залында лот бойынша қатысушылардың баға ұсыныстары көрсетіледі, олар лотты шарттарды сақтай отырып сатып алуға келісімін білдіру нысаны болып табылады және ағымдағы баға қалыптастырылады;

аукцион басталған сәттен бастап қатысушыға басқа қатысушының ең жоғары ағымдағы бағасын осы Қағидалардың 41 (қырық бір) тармағына сәйкес белгіленген қадамға көтеру мүмкіндігі беріледі. Аталған Қағидалар Қазақстан Республикасы Қаржы министрінің 2015 жылғы 17 (он жетінші) наурыздағы №178 (жүз жетпіс сегіз) бұйрығымен бекітілген (бұдан әрі – Қағидалар).

Сауда қатысушылардың бірі ұсынған ең жоғары бағаға дейін жалғасады;

егер аукцион басталғаннан кейін 20 (жиырма) минут ішінде қатысушылардың ешқайсысы ең жоғары ағымдағы бағаны көтермесе, онда жеңімпаз оны ұсынған қатысушы болып танылады, ал осы лот бойынша аукцион өткізілді деп есептеледі;

егер аукцион аяқталу сәтінде, яғни 17:00 (он жеті нөл-нөл) сағатта аукционның жеңімпазы анықталмаған болса, онда жеңімпаз ретінде лотты сатып алу ниетін соңғы болып растаған қатысушы танылады және осы лот бойынша аукцион өткізілді деп есептеледі.

Әрбір сатылған мүлік бойынша аукцион нәтижелері сауда нәтижелері туралы электрондық хаттамамен рәсімделеді, ол веб-порталда сатушы мен жеңімпаздың ЭЦҚ қол қоюымен аукцион өткізілген күні рәсімделеді.