Сенімгерлік басқарушы: - тұрмыстық қатты қалдықтарды қабылдау және көму қызметтерін көрсетеді. Сенімгерлік басқарушы қабылданатын қалдықтардың әрбір партиясын таразылап, есепке алуға, дозиметриялық бақылау жүргізуге міндетті. ТҚҚ-ның келіп түскен көлемі арнайы автокөлік кірген және шыққан кезде автомобильдік таразыларда өлшенеді. Дозиметриялық бақылау радиациялық бақылаудың белгіленген тәртібіне сәйкес сертификатталған аспаптар арқылы өлшеу жүргізу жолымен жүзеге асырылады. Өлшеу нәтижелері мен жүргізілген өлшеулердің деректері тіркеу журналына енгізіліп, онда белгіленеді; - аккредиттелген мамандандырылған зертхананы тарта отырып, тоқсан сайын өндірістік-экологиялық бақылауды (ӨЭБ) және қоршаған ортаға әсерді мониторингтеуді жүзеге асыруға, сондай-ақ ӨЭБ нәтижелері бойынша есепті Шымкент қаласы бойынша Экология департаментіне ұсынуға міндетті; - табиғатты қорғау іс-шараларының орындалуы, қалдықтарды түгендеу және Қазақстан Республикасының заңнамасында көзделген өзге де есептерді Шымкент қаласы бойынша Экология департаментіне және өзге де уәкілетті органдарға ұсынуға міндетті; - іс-шаралар Қазақстан Республикасының Экологиялық кодексінің 350-бабында (бұдан әрі – Кодекс) көзделген талаптарға сәйкес міндетті болып табылады. Аталған бапта қоршаған ортаны қорғауды қамтамасыз ету, соның ішінде фильтратты, сарқынды суларды және полигондық газдың шығарындыларын мониторингтеу, ластанудың алдын алу, сондай-ақ полигонның технологиялық тұрғыдан қауіпсіз пайдаланылуын ұйымдастыру талаптары белгіленген; - полигонда газдың шығарындыларын мониторингтеу жүйесін орнатуға міндетті; - тұрмыстық қатты қалдықтарды қабылдау қызметтерін 1 тонна үшін ҚҚС-сыз 2430 теңгеден аспайтын тариф бойынша көрсетеді, бұл Шымкент қаласы әкімдігінің 2025 жылғы 19 мамырдағы № 2668 қаулысына және Шымкент қаласы мәслихатының 2023 жылғы 3 сәуірдегі № 2/16-VIII шешіміне сәйкес айқындалған. Халық үшін тұрмыстық қатты қалдықтарды жинау, тасымалдау, сұрыптау және көму тарифі қайта қаралған жағдайда, полигонға ТҚҚ қабылдау жоғарыда көрсетілген нормативтік-құқықтық актілермен бекітілген тариф бойынша жүзеге асырылады; - сенімгерлік басқару кезеңінде полигонда алдын ала сұрыпталған тұрмыстық қатты қалдықтарды көмуге міндетті, өйткені Кодекстің 350-бабының 5-тармағына сәйкес тұрмыстық қатты қалдықтарды алдын ала сұрыптаусыз көмуге тыйым салынады. Бұл қоршаған ортаға теріс әсерді азайту, көмуге жіберілетін қалдықтар көлемін төмендету және қайта өңдеуге жарамды материалдарды бөліп алу мақсатында қажет. Сенімгерлік басқарушы ұлттық сұрыптау стандарттарына сәйкес болу үшін полигонда сұрыптау желісін (сұрыптау технологиясын) орнатуды қамтамасыз етеді (заңнама талаптарына сәйкес); - «Шымкент қаласында тұрмыстық қатты қалдықтарды жинау, тасымалдау және сұрыптау» МЖӘ жобасы аясында құрылысы көзделген, жылына 300 мың тонна қуаттылықтағы сұрыптау кешені пайдалануға берілгенге дейін тұрмыстық қатты қалдықтарды сұрыптауды жүзеге асырады; - қалдықтарды көму барлық талаптарды, жинақтау мен оқшаулау қағидаларын («сэндвич» әдісі) сақтай отырып жүзеге асырылуы тиіс. Сұрыпталған қалдықтар қабат-қабат етіп төселіп, әр қабаты оқшаулау қабатымен жабылады. Бұл әдіс қалдықтар көлемін және оларды көмуге қажетті аумақты азайтуға, қоршаған ортаға теріс әсерді барынша төмендетуге, сондай-ақ топырақ пен судың ластануының алдын алуға бағытталған; - сенімгерлік басқару кезеңінде полигонның жою қорын (ликвидациялық қор) құруға міндетті, бұл Кодекстің 350-бабының 16-тармағында көзделген талап болып табылады. Аталған тармақ полигонды жабуды, жерді рекультивациялауды, кейінгі экологиялық мониторинг пен ластану бақылауын қамтамасыз ету үшін жою қорын құруды міндеттейді. Жою қорының болмауы полигонды пайдалануға тыйым салады. Қор қоршаған ортаны қорғау саласындағы уәкілетті орган бекіткен қағидаларға сәйкес полигонның сенімгерлік басқарушысы тарапынан қалыптастырылуы тиіс; - Жобалық-сметалық құжаттаманы алғаннан кейін бір айдың ішінде, еш кідіріссіз, полигонның сенімгерлік басқарушысы ҚР Экологиялық кодексінің 350-бабының 16-тармағына сәйкес полигонды жабу және рекультивациялау үшін ликвидациялық қор қалыптастыруға міндетті. Ликвидациялық қор полигонның баланс ұстаушысы болып табылатын «Шымкент қаласының қалалық жайлы ортаны дамыту басқармасы» мемлекеттік мекемесінің балансында ашылатын арнайы эскроу-шотқа сенімгерлік басқарушының жыл сайынғы аударымдары есебінен қалыптастырылады.

Тұрмыстық қатты қалдықтарды сұрыптау нәтижесінде алынған қайталама шикізатты Сенімгерлік басқарушы өз қалауы бойынша, шарттық бағамен жүзеге асырады.

Объектіні тек оның нысаналы мақсаты бойынша пайдалану. Мүлікті қайта жабдықтау бойынша жұмыстарды жүзеге асырмау, сондай-ақ Баланс ұстаушының келісімінсіз объектіні толық немесе ішінара үшінші тұлғаларға қайта жалға (субарендаға) бермеу.

Мүлікті тиісті жағдайда ұстау, Мүліктің зақымдалуына әкелуі мүмкін әрекеттерге жол бермеу, қоршаған ортаны қорғау нормалары мен қағидаларын, жол қозғалысы ережелерін, санитариялық нормалар мен ережелерді, сондай-ақ өрт қауіпсіздігі қағидаларын сақтау.

Қазақстан Республикасының заңнамасына сәйкес объектіні басқару үшін қажетті барлық рұқсат құжаттарын уәкілетті мемлекеттік органдардан алу (экологиялық рұқсат, санитариялық-эпидемиологиялық қорытынды және т.б.).

Қазақстан Республикасының заңнамасында белгіленген тәртіпке сәйкес Мүлікті есепке алуды және сақталуын қамтамасыз ету, ал Мүлік зақымдалған немесе жойылған жағдайда оны құны мен сипаттамалары бойынша тең мүлікпен ауыстыруға міндетті.

Шарттық міндеттемелерді тиісінше орындамау салдарынан келтірілген залалды өтеуді қамтамасыз ету.

Баланс ұстаушыға тоқсан сайын және оның талабы бойынша атқарылған жұмыс туралы есеп ұсыну.

Мүлікті және оған іргелес аумақты қолданыстағы санитариялық-гигиеналық нормаларға сәйкес ұстау, дезинфекция мен дератизацияны қамтамасыз ету.

Мүлікке немесе онда орналасқан инженерлік және коммуникациялық желілерге зақым келтіруі мүмкін әрекеттерге жол бермеу, сондай-ақ қажет болған жағдайда оларды пайдаланатын ұйымдардың қолжетімділігін қамтамасыз ету.

Коммуналдық және өзге де қызметтерге шарттарды өз бетінше жасасу.

Қазақстан Республикасының заңнамасында көзделген төлемдерді уақытылы төлеуді қамтамасыз ету.

Сенімгерлік басқарушы сенімгерлік басқару шеңберінде жүзеге асырылатын қызметке қатысты қажеттілігіне қарай сұратылатын барлық құжаттарды «Шымкент қаласының қалалық жайлы ортаны дамыту басқармасы» мемлекеттік мекемесіне ұсынуға міндетті.

Қажет болған жағдайда, Қазақстан Республикасының заңнамасының талаптарына сәйкес жүзеге асырылатын қызметтің рұқсат етілуі мен қауіпсіздігі туралы қорытындыларды, оның ішінде экологиялық, санитариялық-эпидемиологиялық және өзге де міндетті сараптамаларды уәкілетті мемлекеттік органдардан алу.

Қазақстан Республикасының Экологиялық кодексі, нормативтік-құқықтық актілері және ұлттық стандарттарының талаптарын қатаң сақтай отырып қызметті жүзеге асыру.

Сенімгерлік басқарушы полигонда өрттің туындауын болдырмау бойынша шаралар қабылдауға міндетті, оның ішінде: - өртке қарсы тосқауылдарды қамтамасыз ету, оқшаулау қабаттарын жасау үшін инертті материалдарды пайдалану; - ғимараттар мен құрылыстардың қауіпсіздігі туралы Техникалық регламенттің талаптарына сәйкес қызметкерлерді өрт қауіпсіздігі шараларына оқыту.

Сұрыптау желісін (сорттау технологиясын) полигон аумағында орналастыру барысында сенімгерлік басқарушы Қазақстан Республикасының қолданыстағы заңнамасына сәйкес барлық жерге орналастыру, сәулет-қала құрылысы саласындағы рұқсат беру құжаттамасын алуға және жобалау-сметалық құжаттаманы әзірлеуге міндетті.

Қазақстан Республикасының нормативтік-құқықтық актілеріне сәйкес рұқсат құжаттарын алу және полигонды рекультивациялау жобасын әзірлеу үшін қажетті жобалық-сметалық құжаттаманы шартқа қол қойылған күннен бастап 7 ай ішінде әзірлеуді қамтамасыз ету.

Кемінде 16 адам үшін жұмыс орындарын құруды қамтамасыз ету.