Конкурс Қазақстан Республикасы Экология және табиғи ресурстар министрінің 2026 жылғы 22 шілдедегі № 140 бұйрығымен бекітілген Киік дериваттарын өткізу қағидаларына (бұдан әрі - Қағидалар) сәйкес өткізіледі.
Конкурсты өткізу қағидалары:
1. Конкурсқа қатысуға арналған өтінімдерді ашу конкурсты өткізу туралы хабарландыруда көрсетілген конкурстың күні мен уақыты басталған кезде тізілімнің веб-порталы арқылы автоматты түрде жүзеге асырылады.
Тізілімнің веб-порталы конкурсқа қатысуға екіден аз өтінім қабылдаған кезде немесе комиссия конкурсқа қатысуға екіден аз қатысушыны жіберген кезде конкурс өтпеді деп танылады. Конкурс өтпеді деп танылған кезде осы конкурсқа қатысуға арналған өтінімдерді ашу жүргізілмейді, ал сатушы конкурсты өткізу туралы хабарландыруда көрсетілген конкурстың уақыты мен күнінен кейін 24 сағат ішінде тізілімнің веб-порталы қалыптастыратын конкурс өтпеді деп танылған актіге ЭЦҚ-ны пайдалана отырып қол қояды.
2. Комиссия өтінімдерді (конкурстық өтінім мен бағалық ұсыныстан басқа) және қатысушының Қағидалардың 14-тармағына сәйкес ұсынған құжаттарын қарайды. Өтінімде анықталған сәйкессіздіктер болған, көрсетілген құжаттар болмаған немесе сәйкес келмеген жағдайда қатысушының электрондық поштасына хабарлама жіберіледі.
3. Хабарлама комиссия хатшысы тізілімнің веб-порталында генерациялайтын және комиссия мүшелері ЭЦҚ-ны пайдалана отырып қол қоятын өтінімдерді ашу хаттамасының негізінде қалыптастырылады. Өтінімдерді ашу хаттамасында конкурсқа қатысушылардың өтінімдерін қайта ашу күні мен уақыты, конкурс шарттарын қанағаттандыратын қатысушылардың тізімі және себептері көрсетілген, конкурс шарттарын қанағаттандырмайтын қатысушылардың тізімі айқындалады.
4. Өтінімдерді қайта ашу күніне дейін қатысушылар тізілімнің веб-порталында қатысушының ЭЦҚ-сымен қол қойылған қосымша өтінімді (конкурстық өтінім мен бағалық ұсыныстан басқа) қалыптастыру арқылы анықталған сәйкессіздіктерді жояды.
5. Комиссия конкурсқа қатысуға арналған өтінімдерді, соның ішінде конкурстық өтінімді қарайды және комиссия хатшысы тізілімнің веб-порталында қалыптастырған конкурсқа жіберу хаттамасына қол қояды. Комиссияның қатысушыларды конкурсқа жіберу туралы шешімі барлық комиссия мүшелері конкурсқа жіберу туралы хаттамаға ЭЦҚ-ны пайдалана отырып қол қойған сәттен бастап тізілімнің веб-порталында автоматты түрде жарияланады, бұл ретте конкурсқа қатысуға өтінім берген барлық қатысушыларға электрондық пошта арқылы автоматты түрде хабарлама жіберіледі.
6. Конкурсқа қатысуға жіберу туралы хаттамада себептері көрсетілген, конкурсқа қатысуға жіберілмеген қатысушылардың тізімі және конкурсты өткізу күні мен уақыты көрсетілген, конкурсқа қатысуға жіберілген қатысушылардың тізімі қамтылады. Конкурсты өткізу күні мен уақытын тізілімнің веб-порталы комиссияның конкурстың кемінде екі қатысушысын жіберу туралы шешімі жарияланған күннен бастап бірінші жұмыс күніне автоматты түрде тағайындайды.
7. Конкурсқа жіберілген қатысушылар конкурс басталғанға дейін бір сағаттан кешіктірмей тізілімнің веб-порталы автоматты түрде берген аукциондық нөмірді және ЭЦҚ-ны пайдалана отырып, тізілімнің веб-порталындағы аукцион залына кіру мүмкіндігін алады. Конкурс тізілімнің веб-порталы тағайындаған уақытта басталады.
8. Киік дериваттары үшін ең жоғары бағаны ұсынған қатысушы конкурстың жеңімпазы деп танылады. Конкурс басталған сәттен бастап қатысушыға «Ақпараттық-есептеу орталығы» АҚ Директорлар кеңесінің шешімімен бекітілген Мемлекеттік мүлік тізілімінің веб-порталында мүлікті сату бойынша электрондық сауда-саттық өткізу регламентінің 43-тармағына сәйкес белгіленген қадамға басқа қатысушының ең жоғары ағымдағы бағасын арттыруға мүмкіндік беріледі.
Конкурс басталғаннан жиырма минут ішінде ағымдағы баға өспеген жағдайда, ең жоғары ағымдағы бағаны ұсынған қатысушы жеңімпаз деп танылады, ал екі және одан да көп бірдей ең жоғары бағалық ұсыныстар болған кезде, өтінімі осындай бағаны ұсынған басқа қатысушылардың өтінімдерінен бұрын қабылданған қатысушы жеңімпаз деп танылады.
Конкурс аяқталған сәтте белгілі бір жеңімпаз болмаған жағдайда, киік дериваттарын сатып алу ниетін соңғы болып растаған қатысушы жеңімпаз деп танылады. Осы жағдайларда конкурс өткізілді деп танылады.
9. Әрбір сатылған лот бойынша конкурстың нәтижелері конкурс нәтижелері туралы хаттамамен ресімделеді, оған тізілімнің веб-порталында сатушы мен жеңімпаз конкурс өткізілген күні ЭЦҚ-ны пайдалана отырып қол қояды. Конкурс нәтижелері туралы хаттама конкурс нәтижелерін және жеңімпаз бен сатушының сату бағасы бойынша киік дериваттарын сатып алу-сату шартына қол қою міндеттемелерін бекітетін құжат болып табылады.
10. Сауда-саттықты ұтып алған тұлға сауда-саттық нәтижелері туралы хаттамаға немесе сатып алу-сату шартына қол қоймаған жағдайда өзі енгізген кепілдік жарнасынан айырылады және осындай қол қоймау салдарынан туындаған, құжатпен расталған шығындарды сатушыға кепілдік жарнамен жабылмаған бөлігінде өтейді.
11. Сатып алу-сату шарты электрондық форматта тізілімнің веб-порталында немесе жазбаша түрде жасалады, оған тізілімнің веб-порталымен сауда-саттық қорытындылары шығарылған күннен бастап он күнтізбелік күн ішінде сатушы, сатып алушы және ведомстволық бағынысты ұйым қол қояды.
