Бағаны төмендету аукционын өткізу қағидалары:

1) егер аукцион басталғаннан кейін екі минут ішінде қатысушылардың ешқайсысы сату объектісін сатып алуға ниетін раста-маса, онда сату объектісінің бастапқы бағасы Пайдаланылмайтын мүлікті беру, іске асыру, жою, кәдеге жарату, көму және қайта өңдеу, сондай-ақ пайдаланылмайтын қорғаныс объектілерін мүліктік жалдауға (жалға) беру қағидаларына сәйкес белгіленген қадамға төмендетіледі. Аталған қағидалар Қазақстан Республикасы Үкіметінің 2019 жылғы 6 қарашадағы №832 қаулысымен бекітілген;

2) егер бағаны төмендеткеннен кейінгі екі минут ішінде қатысушылардың ешқайсысы сату объектісін сатып алуға ниетін раста-маса, онда сату объектісінің соңғы жарияланған бағасы белгіленген қадаммен қайта төмендетіледі.

Бағаны төмендету аукционының жеңімпазы – жарияланған бағамен сату объектісін сатып алуға деген ниетін бірінші болып растаған қатысушы болып табылады, және аталған сату объектісі бойынша аукцион өткізілді деп танылады;

3) егер сату объектісінің бағасы белгіленген ең төменгі мөлшерге жеткен кезде қатысушылардың ешқайсысы сатып алу ниетін раста-маса, онда аукцион өткізілмеген деп танылады.

Егер бағаны төмендету аукционы 17:00-де аяқталған сәтте жеңімпаз анықталмаса, онда осы сату объектісі бойынша аукцион өткізілмеген деп есептеледі.

Әрбір сатылған мүлік бойынша аукцион нәтижелері сауда нәтижелері туралы хаттамамен рәсімделеді, ол Комиссиямен және жеңімпазбен ЭЦҚ қолдана отырып сауда өткізілген күні веб-порталда қол қойылады.

Сауданы жеңіп алған тұлға сатып алу-сату шартын жасамаған жағдайда, сондай-ақ сатып алушы сатып алу-сату шарты бойынша міндеттемелерді орындамаған немесе тиісінше орындамаған жағдайда, олардың енгізген кепілдік жарнасы жоғалады және уәкілетті ұйымның қарамағында қалады.